ފިހާރަ ފަޅާލާ މުދާތައް ހިފާގެން ދިޔައީ މީހުން ބަލަންތިއްބާ. ހުއްޓުވާނެ މީހަކު ނެތް.

މަޖީދީމަގުގައި ހުންނަ ޒިއޯން މޯބައިލްސް 4 ގެ މައި ދޮރުގެ ބިއްލޫރިގަނޑު ތަޅާލައިގެން ވަދެ ވައްކަން ކޮށްފި އެވެ.

ފުލުހުން ބުނީ މިއަދު ފަތިހު 5:35 ހާއިރު ފިހާރައެއްގެ ބިއްލޫރިގަނޑު ތަޅާލައި ވަށްކަން ކޮށްފައިވާ މައްސަލައެއް ފުލުހުންނަށް ރިޕޯޓްކޮށްފައިވާ ކަމަށެވެ.

ފިހާރައިގެ ސީސީޓީވީ ފޫޓޭޖުން ފެންނަ ގޮތުގައި ފިހާރައިގެ ދޮރުގެ ބިއްލޫރިގަނޑު ތަޅާލަނީ ފިހާރަ ކައިރިން ހިނގާފައިދަމުން އަތުގައި އޮތް އެއްޗަކުން ޖަހަ އެވެ. ބޮލުގައި ތޮއްޕެއް އަޅައިގެން އަދި ރޮނގު ދެމި ޓީޝާޓެއް ލައިގެން ހުރި އެ މީހާ ބިއްލޫރިގަނޑު ތަޅާލުމަށް ފަހު ދަނީ އެތަނަށް ނުވަދެ އެވެ. ބިއްލޫރިގަނޑު ތަޅާލި މީހާ ލައިގެން ހުރީ ރޮނގުދެމި ޓީޝާޓެއް ނަމަވެސް ފިހާރަ ތެރޭގައި އުޅުނީ ކަޅު ޓީޝާޓެއްގައި ހުރި މީހެކެވެ. އެކަމަކު ލައިގެން ހުރި ސޯޓާއި އަަރައިގެން ހުރި ފައިވާނާއި އެހެން ކަންކަމަށް ބަލާއިރު އެއީ ހަމަ އެކަކެވެ.

މިމައްސަލަ އާއި ގުޅިގެން އަދި މީހަކު ހައްޔަރުކޮށްފައެއް ނުވެ އެވެ. އެކަމަކު މައްސަލަ ތަހުގީގު ކުރަމުންދާ ކަމަށް ފުލުހުން ބުންޏެވެ.

އޭނާ ފިހާރައަށް ވަނުމަށް ފަހު ކައުންޓަރުގައި ހުރި ވަތްގަނޑު ހަލާކުކޮށްލައިގެން ހުޅުވަ އެވެ. އެކަމަކު ބެލެވޭ ގޮތުގައި އެ ވަތްގަނޑުގައި ފައިސާއެއް ނެތެވެ. އެހެންވެ ދެން އެ ކައުންޓަރުގައި ހުރި ކޮތަޅުތަކެއް ނަގައިގެން ގޮސް، ފިހާރައިގެ ރެކުގައި ހުރި ފޯނުތައް ނަގައި ކޮތަޅުތަކަށް އަޅާތީ ފެނެ އެވެ. އަދި މުދާތައް ނަގައިގެން އޭނާ ނިކުމެގެން ދިޔައިރު މަންޒަަރު ބަލަން މީހަކު ހުއްޓާވެސް ފެނެއެވެ. އެހެންނަމަވެސް އޭނާ ހުއްޓުވާ ހިފައްޓަން މަސައްކަތްކޮށްފައެއް ނުވެއެވެ.

ފިހާރައެއް ފަޅާލައި ވައްކަންކޮށް ކޮށްފައި މިވަނީ ވައްކަމުގެ މައްސަލަ ރިޕޯޓް ކުރާ އަދަދު މަދުވެފައިވާ ކަމަށް ފުލުހުން ބުނެފައި ވަނިކޮށެވެ.