ހއ.ތަކަންދޫގައި ފެނާއި ނަރުދަމާގެ ނިޒާމުގެ މަސައްކަތް ނިންމާލައިފި

ހއ. ތަކަންދޫގައި ކުރިއަށް ގެންދެވުނު ފެނާއި ނަރުދަމާ ނިޒާމުގެ މަސައްކަތްތައް ނިމުމަކަށް އައިސްފައިވާ ކަމަށް މާލެ ވޯޓަރ އެންޑް ސްވަރޭޖް ކޮމްޕެނީ ޕްރައިވެޓް ލިމިޓެޑް (އެމް.ޑަބްލިޔު.އެސް.ސީ) އިން ހާމަކޮށްފިއެވެ.

މި މަޝްރޫޢުގެ ދަށުން ފެން ޕްލާންޓް ބެހެއްޓުމަށް ފެސިލިޓީ ބިލްޑިންގ ޤާއިމުކުރެވި، ފެން ހޮޅީގެ މައި ނެޓްވޯކް އެޅި، ގޭގެއަށް ފެނުގެ ކަނެކްޝަން ގުޅައިދެވި، ފެން އުފެއްދުމަށް ބޯހޯލް ތޮރުފައި، ރިޖެކްޓް ލައިން އަޅައި، ފެން ރައްކާކުރުމަށް ފެންތާނގީ ބަހައްޓިފައިވެއެވެ.

ނަރުދަމާ ނިޒާމު ޤާއިމުކުރުމުގެ މަސައްކަތުގެ ތެރޭގައި، ނަރުދަމާގެ މައި ނެޓްވޯކާއި ޕަމްޕިންގ ލައިން އެޅި، ޕަމްޕިންގ ސްޓޭޝަން ޤާއިމުކޮށް، ސީ އައުޓްފޯލް އަޅައި، ގޭގޭގައި ޖަންކްޝަން ބަހައްޓައި، ނަރުދަމާގެ ކަނެކްޝަން ގުޅައިދެވިފައިވެއެވެ.

މީގެއިތުރުން، ފެން ތަޙުލީލުކުރުމަށް ބޭނުންވާ ސާމާނާއި ނަރުދަމާ ނިޒާމު ހިންގައި ބެލެހެއްޓުމަށް ބޭނުންވާ ވެހިކަލް އެމް.ޑަބްލިޔު.އެސް.ސީގެ ފަރާތުން ފޯރުކޮށްދިނުމަށްވެސް ނިންމާފައިވެއެވެ.