އާޒިމު ވަޒީފާދިން "ޕާޓީ ބޭފުޅުން" ގެ ތެރެއިން އެންމެ 8 މީހުންނަށް ކައުންސިލުން މަހަކު 261،000ރ، އަހަރަކު 3 މިލިއަނަށްވުރެ ގިނަ ރުފިޔާ

މާލެ ސިޓީ ކައުންސިލަށް ކޮންސަލްޓަންޓުންގެ ގޮތުގައި ނަގާފައިވާ 8 މީހަކަށް ކޮންމެ މަހަކު 261،000 އަށް ވުރެ ގިނަ ރުފިޔާ ހަރަދު ކުރަމުންދާ ކަން އެނގިއްޖެ އެވެ.

އެމްޑީޕީގެ ލާމަރުކަޒީ ގުޅުން ކޮންފަރެންސްގައި އެމްޑީޕީއަށް ނިސްބަތްވާ މާލޭސިޓީގެ މޭޔަރ އާދަމް އާޒިމް ދެއްކެވި ވާހަކައިގައި މާލެސިޓީ ކައުންސިލަށް ކޮންސަލްޓެންޓުންގެ ގޮތުގައި އެމްޑީޕީއަށް ނިސްބަތްވާ 15 މީހަކު ނަގާފައިވާނެ ކަމަށް ވަނީ ވިދާޅުވެފައެވެ. އެހެންނަމަވެސް ކައުންސިލުން މިހާރު ނޫހަށް މައުލޫމަތް ދެމުން ބުނެފައިވަނީ މިހާތަނަށް ނަގާފައިވަނީ 8 ކޮންސަލްޓެންޓުންކަމަށެވެ.

އެ މީހުންނަށް އިތުރު ވަގުތުގެ އެލަވަންސާ ނުލައި މުސާރައިގެ ގޮތުގައި މަހަކު 261،000ރ. ހަރަދު ކުރާ ކަމަށް ކައުންސިލުން ބުންޏެވެ.

މާލެ ސިޓީ ކައުންސިލްގެ ކޮންސަލްޓަންޓުން

1. މުހައްމަދު ޝާހިދު، ފައިނޭންޝިއަލް ކޮންސަލްޓަންޓު - 35،000ރ.

2. ހަބީބް ޒާހިރު، ރިޕޯޓް ރައިޓިން ކޮންސަލްޓަންޓު - 35،000ރ.

3. މުހައްމަދު ޝަރީފް، ސިވިލް އިންޖީނިއާ ކޮންސަލްޓަންޓު - 35،000ރ.

4. މުހައްމަދު ޝިހާބު، ސޯޝަލް ވެލްފެއާ ކޮންސަލްޓަންޓް - 35،000ރ. (ޖެންޑާ މިނިސްޓްރީގެ ކުރީގެ ސްޓޭޓް މިނިސްޓަރު)

5. ޔަމީން މުހައްމަދު، އިންފޮމޭޝަން ޓެކްނޮލޮޖީ ކޮންސަލްޓަންޓް - 35،000ރ.

6. ރަމްޒީ އަބޫބަކުރު، މެނޭޖްމަންޓް ކޮންސަލްޓަންޓް - 30،000ރ. (އެމްޓީސީސީގެ ކުރީގެ ޖެނެރަލް މެނޭޖަރު)

7. މަރިޔަމް ނާޒިމާ، އެޑްމިނިސްޓްރޭޓިވް ކޮންސަލްޓަންޓް - 28،000ރ. (އިކޮނޮމިކް މިނިސްޓްރީގެ ކުރީގެ ޑެޕިއުޓީ މިނިސްޓަރު)

8. އަލީ ހާލިދު، މީޑިއާ އެގްޒެކެޓިވް - 28،000ރ. (ޕީއެސްއެމްގެ ކުރީގެ އެމްޑީ)

އެމްޑީޕީގެ ލާމަރުކަޒީ ގުޅުން ކޮންފަރެންސްގައި އެމްޑީޕީއަށް ނިސްބަތްވާ މާލޭސިޓީގެ މޭޔަރ އާދަމް އާޒިމް ދެއްކެވި ވާހަކައިގައި މާލެސިޓީ ކައުންސިލަށް ކޮންސަލްޓެންޓުންގެ ގޮތުގައި އެމްޑީޕީއަށް ނިސްބަތްވާ 15 މީހަކު ނަގާފައިވާނެ ކަމަށް ބުނުމުން އެވާހަކަ ޓުވީޓްކުރާއިރު އެޑިޓްކުރުމަށް އެޕާޓީގެ ޗެއާޕާސަން ފައްޔާޒް ވަނީ އެމްޑީޕީގެ ސޯޝަލްމީޑިއާ އެކްޓިވިސްޓް ’ޝަތުފާ‘ އަށް އިރުޝާދު ދީފައެވެ.

އެ މައްސަލާގައި އޭނާ އަށް ވަރަށް ބޮޑަށް ފާޑު ކިޔުން އަމާޒުވި އެވެ.