ޗާގޯސްގެ މައްސަލައިގައި ރައީސް މުއިއްޒުގެ ސިޓީފުޅެއް އިނގިރޭސި ވިލާތަށް

ރާއްޖޭގެ ދެކުނުން އިންޑިއާ ކަނޑުގައި އޮންނަ ޗާގޯސްގެ ރަށްތައް މޮރިޝަސް އަށް ދޭން އިނގިރޭސި ވިލާތުން އެއްބަސްވުމާ ގުޅިގެން ރައީސް ޑރ. މުހައްމަދު މުއިއްޒު، އިނގިރޭސި ވިލާތަށް ހާއްސަ ސިޓީފުޅެއް ފޮނުއްވައިފިއެވެ.

ޗާގޯސް އައިލެންޑްސް ނުވަތަ ފޯޅަވަހީގެ ސިޔާދަތީ ބާރު މޮރިޝަސްއަށް ދީ އެތަނުގައި މީހުން ވަޒަންވެރިވުމުގެ ފުރުސަތު ދިނުމަށް އިނގިރޭސި ވިލާތުން އެއްބަސްވެ، އެކަމާ ގުޅޭ ބަޔާނެއް އެ ގައުމުގެ ފޮރިން މިނިސްޓްރީން ނެރުނީ މިދިޔަ މަހުގެ ކުރީކޮޅެވެ.

ޖުމްހޫރީ ދުވަހުގެ ރަސްމީ ޖަލްސާގައި ރައީސް ޑރ. މުއިއްޒު ވިދާޅުވީ ރާއްޖޭގެ ކަނޑުގެ ސަރަހައްދުން ގެއްލުނު ބައި ހޯދުމަށްޓަކައި މި ސަރުކާރުން ކެނޑިނޭޅި މަސައްކަތް ކުރަމުންދާ ކަމަށާއި އެ ސަރަހައްދުން ބައެއް ގެއްލުނީ ބަޔަކު ގަސްތުގައި ކުރި ކަމަކުން ކަމަށެވެ. ގާނޫނުއަސާސީއާ ހިލާފަށް ރާއްޖޭގެ ކަނޑުން ބައެއް ގެއްލުވާލި އިރު ކަނޑުން ގެއްލުނު ބައި ހޯދަން މި ސަރުކާރުން ރެއާއި ދުވާލު މަސައްކަތް ކުރަމުންދާ ކަމަށް އެމަނިކުފާނު ވިދާޅުވިއެވެ.

މީގެ އިތުރުން ރައީސް ވިދާޅުވީ ކަނޑުން ގެއްލުނު ބައި ހޯދުމަށާއި އެހެނިހެން ކަންތައްތައް ކުރުމުގައި ފަހަތަށް ޖެހުމެއް ނެތި ކުރިޔަށް ދާނެ ކަމަށެވެ. ހަމައެއާއެކު ރާއްޖޭގެ ކަނޑުގެ ސަރަހައްދު ބެލެހެއްޓުމަށް ސަރުކާރުން މިހާރުވެސް ގިނަ މަސައްކަތްތައް ކުރަމުންދާކަން ރައީސް ވަނީ ފާހަގަކުރައްވާފައެވެ.